Rakyat vs
Pemerintah,Baca Bek Salah Jeb Ubat Sabee Masa..!
_
Assalamu alaikum warah matullah
saluem sipatah meuhat lam do a
mula lam rawi dgn bismilah
mula lam naskah beurukat dum na
_
hana cit tuwo lon pujoe Allah
Alhamdulillah atueh sigala
Seulaweut saluem keu Rasulullah
Aneuk Abdullah Muhammad nama
_
Hana le panyang lam mukaddimah
Jino le bagah rinteh peumula
Maksud lam diri meutuleh naskah
Tentang masalah jamun jinoe ka
_
Ngon awe lilen gaseu lon papah
Ngon awe geutah cop on meuria
Meusigak rangkang aleu trieng tuplah
Tameh tatarah meubak turusa
_
Jayeh jamun nyo serueba salah
Jayeh hanapah rame lam donya
Rakyat di nanggro palo perintah
Hana ji indah akan umara
_
Ureung di gampong rame yg sosah
Han pue tapugah cuba neukira
Rakyat jeulata ngon pemerintah
Hana si arah peudong neugara
_
Rasa peucaya ka peucah belah
Rakyat pemerintah meu laen dua
Hana teubukti janji amanah
Nariet jipugah wate pilkada
_
Peurule rakyat wate yoh sosah
Peurule tuah akan suara
Haba yg mameh tubiet dibabah
Haba yg indah peumakmu bangsa
Nafsu meuhase ka laen arah
Jarueng amanah sampo keu nyata
Nyokuh jamunnyo seruba salah
Tamse tapugah neucep2 rasa
Meu jroh pemimpin rakyat han sosah
Meu jroh amanah rakyat seujahtra
Aleh keuh pajan troh pimpinan ceudah
Lage di sa ah Iskandar Muda
Rakyat dum makmu pateh perintah
Sebab peunugah ikot ulama
Rame dum bale punoh dum dayah
Masjid meunasah ureung meuteuka
Kon lage jino han pue ta pugah
Ureung ka parah mat hukom donya
Ikot2 HAM meunan jipugah
Oh laku salah beutoi jikira
Meuhan neupate lage lon peugah
Neukalon beupah kiban nyo masa
Rame terjadi maksiet meulumpah
Han pre daerah jino ka sama
Kawom pemuda pubuet sex bebah
Ureung meu ukah miseu niaga
Hana so pako keu talo nikah
Wilayatul hisbah keu merek saja
Keubit meupalo jeulatang gajah
Cukop that susah ubat peunawa
Reulhoh peukatuen anuek miet mirah
Poma ngon ayah jarueng geubina
Aleh pajan troh raja arifah
Yang na amanah lage bak haba
Yang tem jak puwo mandum mareu ah
Hukom syari ah meuhat sampeuna
Bek le meuriwang lagenyo sa ah
Urueng dum sosah rame yg papa
Mungken nyo tanda azaub bak allah
Seubab that parah umat lam donya
Wahe syedara bijeh meutuwah
Rakyat pemrintah saleng peucaya
Bek le geutanyo meurupah2
Pangkat meu titah sibok kuasa
Mari sapue khun beu saho arah
Saho jak langkah lage ado a
Takot keu azueb bila na salah
Hukom Potallah laku umara
Kasep keuh dile ulon cang panah
Haba beurakah di dalam maya
Mohon bak mandum beuna peu mu ah
Laju bak Allah ampon lon pinta
Panton: Polem kuta piadah
0 komentar: